Sunday, January 14, 2007

குமுதம் இதை வெளியிடாது.. குழலி மன்னிக்க..

- குப்புசாமி செல்லமுத்து

மூத்த எழுத்தாளர் சுஜாதா அவர்கள் அண்மையில் எழுதி குமுதம் இதழில் வெளிவந்த 'அயோத்தியா மண்டபம்' கதை தமிழ்மணத்தில் வெப்பம் செறிந்த விவாதங்களுக்கு எரியூட்டியுள்ளது.

பாலபாரதியின் பதிவு

சுஜாதாவின் கதை நீட்டிய குழலி

இதைப் பற்றியெல்லாம் சொந்தமாகக் கருத்துக் கூறுமளவுக்கு சமூக, அரசியல் அறிவு அற்றவன் நான். அல்லது இருக்கிற கொஞ்ச நஞ்ச அறிவையும் வெளிப்படுத்தும் துணிச்சல் இல்லாதவன்.

சென்னிமலைப் படிக்கட்டில் உட்கார்ந்து பொறி கடலை தின்று கொண்டிருக்கும் பக்தர்களை மரத்தில் தொங்கியபடி இயலாமையோடும், ஏக்கத்தோடும் பார்த்துக் கொண்டிருக்கும் குரங்கினைப் போல தமிழ்மணத்தில் முடிவில்லாமல் நடந்து கொண்டிருக்கும் மயிர் பிளக்கும் ஆரிய-திராவிட வாதங்களைப் பார்த்துக் கொண்டு ஓரிரண்டு அனானிப் பின்னூட்டங்களோடு நிறுத்தியிருந்த எனக்கே இது மாதிரியான பதிவு இட வேண்டும் என்ற ஆவல் எழுந்தது வியப்பாக உள்ளது.

மூத்தவர் சுஜாதா அவ்வர்களின் அயோத்தியா மண்டபம் கதையில் சாதியம்..மன்னிக்கவும்..உள்குத்து இருப்பதாக ("நான் தயிர் சாதம் சாப்பிடுறவன்..வலிக்கறது..விட்டுருங்கோ" என்ற அந்நியன் பட வசனம் அளவுக்கு) என் சிற்றறிவுக்குப் படவில்லை. கருத்துச் சொல்லும் வேலையை விடுத்து விட்டு..மேட்டருக்குப் போவோம்.. நண்பர்கள் பாலபாரதியும், குழலியும், பார்ப்பனர்கள் என்று அழைக்கப்படுகிறவர்களும் மன்னிப்பதற்கு கதை என்று நான் கூறிக் கொள்ளும் இந்தப் பதிவில் ஒன்றும் இல்லை. வந்து சேரும் அனானிப் பின்னூட்டங்கள் அனுமதிக்கப்படும்.

குமுதம் இதை ஏன் வெளியிடாது என்பதை இறுதியில் சொல்கிறேன்.

------------------
நல்ல கதையா இருக்கே..!

இளைய தலைமுறை அரசியல் சமூக நாயகர்களில் மிக முக்கியமானவர் சுந்தரலிங்கம். சமூக ஏற்றத் தாழ்வுக்கு எதிராகப் போராடும் குணத்தினால் மாநிலம் முழுவதும் போற்றப்படும் மனிதர். இன்னும் அறுபது வயது கூட நிரம்பியிருக்கவில்லை. அவர் சொல்வதை கேட்டு நடக்க எழுச்சி மிக்க இளைஞர் பட்டாளம் எந்த நேரத்திலும் தயாராக இருக்கும்.

அவரது அருமை, பெருமைகளை எல்லாம் கேள்விப்பட்டு ஒரு வெளிநாட்டுத் தொலைக்காட்சியில் இருந்து பேட்டி எடுக்க வந்திருந்தார்கள்.

கோட்டு சூட் அணிந்திருந்த அந்த வட நாட்டுப் பெண் ஆங்கிலத்தில் ஆரம்பித்தாள்.

"வணக்கம் திரு.சுந்தரலிங்கம். உங்கள் மதிப்புள்ள நேரத்தை எங்களுக்கு ஒதுகியதற்காக முதலில் நன்றி சொல்ல விரும்புகிறேன்.”

"எனக்கும் மகிழ்ச்சி”

"பொது வாழ்க்கையில் நீங்கள் எப்படி நுழைந்தீர்கள் என்ற விவரத்தை நேயர்களிடம் கொஞ்சம் பகிர்ந்து கொள்வீர்களா?”

"ஓ..நிச்சயமாக. காந்தியடிகள் தென்னாப்பிரிக்காவில் இரயிலில் பயணம் செய்தார். முதல் வகுப்பு டிக்கெட் வைத்திருந்தும், அவர் வெள்ளையர் அல்லாதவர் என்பதால் இறக்கி விட்டார்கள். அண்ணலின் அரசியல் போராட்டம் அப்போது தொடங்கியது. என்னுடைய பொது வாழ்க்கை அது போன்ற ஒற்றை அவமானச் சம்பவத்தால் உருவானதல்ல.

நான் கல்லூரியில் படிக்கும் போது சில பார்ப்பன மாணவர்கள் திட்டமிட்ட சாதியத்தைப் பரப்பி வந்தார்கள். சொல்லி வைத்தாற் போல சேர்ந்து ஒரு வார காலத்தில் ஒன்று சேர்ந்து இயங்கினார்கள். ஒருவன் என்ன சாதி என்பதை அவனது ஊர் மற்றும் தகப்பனின் தொழில் இரண்டையும் வைத்து தீர்மானமாகக் கணித்து வைத்திருந்தார்கள்.”

"ஒரே மாதிரியான சிந்தனை உடையவர்கள் ஒன்று சேர்வது இயல்பு தானே? இதில் தவறு என்ன இருக்கிறது?”

"நான் சொல்வதைப் பார்த்தால் உங்களுக்கு அப்படித் தான் தோன்றும். அது தான் பார்ப்பனர்களின் செயல்பாடு. எந்த ஒரு விஷயமும் தெளிவாகத் தெரியாதவாறு செய்வது.

அவர்கள் ஒன்று சேர்வது சமுதாயத்தை முன்னேற்றுவதற்காக அல்ல. மாறாக, ஆயிரமாயிரம் ஆண்டுகளாக ஆதிக்க நிலையில் இருப்பதைத் தொடர்ந்து தக்கவைத்துக் கொள்ளவும், முடிந்த வரை மேலும் அதிகப்படுத்தவும் தான். என் அனுபவத்தில் இருந்தே சொல்கிறேன். காலேஜ் கிரிக்கெட் அணியின் தலைவனாக இருந்த பார்ப்பன மாணவன் மோசமாக ஆடினாலும் சக பார்ப்பனர்களையே அணிக்குத் தேர்வு செய்தான். அது போக பார்ப்பனப் பேராசிரியர்கள் வேலைச் சிபாரிசிக் கடிதங்களை அவர்களைச் சேர்ந்தவர்களுக்கே கொடுத்தனர்.

இதெல்லாம் சின்னச் சின்ன நுணுக்கமான சங்கதிகள். நுட்பமாக ஆராய்ந்து பார்த்தால் தான் தெரியும். பெரிதாக ஒன்று சொல்கிறேன். என் தந்தை ஒரு முறை நகர சபைத் தேர்தலில் நின்றார். ஆதரவு கேட்டு ஒரு பிராமணர் வீட்டுக்குப் போனார். நன்றாகத் தேனொழுகப் பேசினார்கள். ஓட்டுப் போடுவதாகவும் உறுதியளித்தார்கள். அவர்களிடம் விடை பெற்றுக் கொண்டு வாசலைத் தாண்டுவதற்கு முன்னரே நாங்கள் நின்ற இடத்தைக் கழுவி விடுமாறு உள்ளே பேசிக்கொண்டார்கள்”

"அப்படியானால், இந்தச் சம்பவம் தான் உங்களுக்கு திருப்பு முனையாக அமைந்தது என்று சொல்லலாமா?”

"சொல்லலாம். ஆனால் 'ஏன் எதற்கு’ என்று கேள்வி கேட்கும் குணம் எனக்குள் நீண்ட காலமாக இருந்து வந்திருக்கிறது. அதைப் பற்ற வைத்த பொறி என்று வேண்டுமானால் இந்தச் சம்பவத்தைக் கூறலாம்”

"இட ஒதுக்கீடு பற்றி என்ன நினைக்கிறீர்கள்?”

"மிகவும் அவசியமான ஒன்று”

"இட ஒதுக்கீடுகள் பொருளாதாரத்தின் அடிப்படையில் இல்லாமல் பிறக்க நேர்ந்த சாதியின் அடிப்படையில் அமைவது தவறல்லவா?”

"தவறு உங்கள் கேள்வியில் தான். ஒன்றை நீங்கள் புரிந்து கொள்ள வேண்டும். இந்த இட ஒதுக்கீடுகள் பொருளாதார ஏற்றத் தாழ்வுகளைச் சரி செய்வதற்காக ஆக்கப்படவில்லை. நாடு முழுவதும் நிலவுகிற சமுதாய ஏற்றத் தாழ்வை அகற்றுவதற்காக உருவாக்கப்படுவது”

"உலகம் சுருங்கி வருகிறது. 'நாமெல்லாம் இந்தியர்' என்ற உணர்வில் அத்தனை பேரும் பேதங்களை மறந்து ஒன்றுபட்டு நிற்கிறோம். இப்படிப்பட்ட சூழ்நிலையில் சாதி அடிப்படையிலான இட ஒதுக்கீடு வேற்றுமை உணர்ச்சியை வளர்க்கும் என்ற பேச்சு அடிபடுகிறதே? இன்னும் எத்தனை நாளுக்குத் தான் இது தொடர் வேண்டும் என எதிர்பார்க்கிறீர்கள்?”

"அதெல்லாம் நொண்டிச் சாக்கு. நாடு சுதந்திரம் பெற்று அறுபது வருடம் ஆகிவிட்டது. இவ்வளவு நாள் சாதிக்காததை இனி மேல் இட ஒதுக்கீட்டை வைத்துச் சாதிக்க முடியாது என்ற வாதத்தை ஒதுக்கித் தள்ள வேண்டும். குறைந்தபட்சம் இரண்டாயிரம் வருடமாவது சாதியின் பெயரால் பேதம் காட்டி வந்துள்ளார்கள். அதைத் துடைக்க வேண்டுமானால், அதில் பாதி..அதாவது ஆயிரம் வருடமாவது இட ஒதுக்கீடு வேண்டும்.

மேலும் பார்ப்பனர்கள் பலர் ஏழையாக இருப்பதாகச் சொல்வது மிகவும் வேடிக்கையானது. இந்தியா அனவரும் சமம் என்ற நிலைக்கு வந்து விட்டதாக நீங்கள் சொன்னீர்கள். அப்படியானால், சவரக் கடை வைத்திருக்கிற, செருப்புத் தைக்கிற பார்ப்பனர் யாரையாவது அடையாளம் காட்ட முடியுமா? அவர்களைப் பொறுத்த வரை இன்சூரன்ஸ் ஏஜென்டாக, ஜோசியக்காரனாக, சமையல் ஒப்பந்தக்காரராக இருப்பதை எல்லாம் ஏழ்மை என்று சொல்கிறார்கள். அப்படிப் பட்ட ஏழ்மை நிலை தொடர்ந்தால் சமுதாயத்திற்கு ஒரு கேடும் வராது.”

"நீங்கள் கண்மூடித்தனமாக பிராமணர்களை எதிர்ப்பதாக ஒரு கருத்து நிலவுகிறதே?”

"மறுபடியும் தெளிவு படுத்துகிறேன். நான் பார்ப்பனர் என்ற சமூகத்தினை எதிர்க்கவில்லை. பார்ப்பனியம் எனற ஆதிக்க முறையத் தான் எதிர்க்கிறேன். இதில் வேடிக்கை என்னவென்றால், பார்ப்பனியத்தைக் கடைபிடிப்பவர்கள் பெரும்பாலும் பார்ப்பனர்களாகவே இருக்கிறார்கள்”

"கொஞ்சம் விளக்க முடியுமா?”

"பார்ப்பனியம் என்பது மனித நீதிக்கு எதிரான மனு நீதியை இழுத்து அணைத்துக் கொண்டது. பிறப்பினால், செய்கிற தொழிலினால் ஏற்றத் தாழ்வு கற்பிப்பது. தமிழ் சமுதாயத்தின் ஆரம்ப நாட்களில் குறிஞ்சி, முல்லை, நெய்தல் என்று நிலத்தின் அடிப்படையில் தான் பிரித்தார்கள். ஆரிய வருகையும், தந்திரமான சூழ்ச்சிகளும் வந்த பிறகு தான் சதுர்வர்ணச் சிந்தனை இங்கே வேர் விட்டது. அதன் நீட்சியாக இப்போதும் பாகுபாடு நிலவுகிறது. நீங்கள் என்னவென்றால், தேசியம்.. சமத்துவம் என்று நகைச்சுவையாகப் பேசிக் கொன்டிருக்கிறீர்கள்”

"நீங்கள் ஒருவர் போராடிவதால் இதெல்லாம் தீர்ந்து விடும் என நம்புகிறீர்களா?”

"நிச்சயமாக இல்லை. வரலாற்றைப் பின்னோக்கிப் பார்த்தால் பார்ப்பனியத்திற்கும், வருண பேதத்திற்கும் எதிரான போராடத்தை எம் அறிஞர் பெருமக்கள் காலஞ்காலமாக நடத்தி வந்திருக்கிறார்கள். நாம் வாழும் காலத்தில் நம்மால் முடிந்த அளவிற்கு அந்தப் பணியைச் செய்ய வேண்டியது எம் கடமையாகிறது.”

"நீங்கள் தான் இப்படிச் சொல்கிறீர்கள். மக்கள் யாரும் உங்கள் பின்னால் இல்லை என்று தெரிகிறது. ஒரு தனியார் தொலைக்க்காட்சி நடத்திய எஸ்.எம்.எஸ் வாக்கெடுப்பில் பெரும்பான்மையான வாக்குகள் இட ஒதுக்கீட்டிற்கு எதிராத வந்தது அதை நிரூபிக்கிறது அல்லவா?”

"... அப்படியா? தனியார் தொலைக்காட்சி நடத்தும் செல்போன் வாக்கெடுப்பு தான் மக்களின் உண்மையான அபிலாசைகளைப் பிரதிபலிக்கும் சாதனம் என்கிறீர்கள். உடனே தேர்தல் ஆணையத்தைச் சந்தித்து அடுத்த பொதுத் தேர்தலை இந்த முறையில் நடத்தச் சொல்லி ஆலோசனை சொல்லலாமே? தற்போது வழக்கில் உள்ள தேர்தல் முறைக்கு செலவு மிகுதியாக ஆகிறதாம்”

"நீங்கள் இந்து மதத்தைப் பிளவு படுத்தும் வேலையில் ஈடுபட்டுள்ளீர்கள். அது, இஸ்லாமிய அடிப்படைவாதத்தில் ஊறிய தீவிரவாதிகளுக்கு வலுச் சேர்ப்பதாக உள்ளதே?”

"மன்னிக்கவும். வந்தேறியாகக் குடி வந்த ஆரியம் பூர்வ குடிமக்களின் இயற்கை வழிபாட்டு முறைய எல்லாம் விழுங்கிச் செரித்து உருவான மதம் தான் இந்து மதம். நீங்கள் சொல்கிற இந்து மதம் பார்ப்பனச் சிந்தனைகளைச் சுமக்கும் ஊடகமாக ஆக்கப்பட்ட ஒரு தொழிற்கட்டமைப்பு என்றே சொல்வேன். நாம் அனைவரும் இந்துக்கள், ஒரே நிலையில் இருப்பவர்கள் என்று வைத்துக் கொள்வோம். அப்படியானால் ஒரு மாதாரி, பறையனை உங்கள் வீடுகளுக்கல்ல, வீதிக்குள் வர விடுகிறீர்களா? இந்து மதக் கடவுள் எல்லோருக்கும் சமம் என்றால் சூத்திரன் கருவறை வரை சென்று வழிபடவோ, பூசிக்கவோ முடிகிறதா? நினைத்தாலே இரத்தம் கொதிக்கிறது”

"நீங்கள் கடவுளே இல்லை என்று சொல்கிற நாத்திகர். அப்படி இருக்கும் போது உங்களுக்கு என்ன கோவிலைப் பற்றியும், சாமியைப் பற்றியும் கவலை? தமிழில் தான் அர்ச்சனை செய்ய வேன்டும் என்று இன்னமும் தெற்கே போராடிக் கொன்டிருக்கிறீர்கள்”

"எந்த ஒரு மனிதனுக்கும் தான் விரும்பிய வழுபாட்டு முறையைத் தேர்ந்தெடுக்கும் உரிமை உண்டு. அதை நான் என்றுமே எதிர்த்ததில்லை. நான் ஒரு வழிபாட்டு முறையப் பின்பற்றுவேன், நீயும் அதைத் தான் பின்பற்ற வேண்டும், அதே நேரம் கடவுள் எனக்கு மட்டும் நெருக்கமானவர், அவரை அடைவதற்கு முன் நீ என்னைத் தான் அணுக வேண்டும், நான் பேசுகிற மொழி தான் கடவுளுக்குப் புரியும் என்று பொய்யான பரப்புரை செய்து வெகுமக்களுக்கு சிந்திக்கும் உரிமையக் கூட மழுங்கடித்த கொடுமையைத் தான் எதிர்க்கிறேன். இந்து மதம்..சரி..இருக்கட்டும். இந்துக் கடவுளுக்காகப் படைக்கப்பட்ட தேவாரமும், திருவாசகமும் மதுராவிலும், காசியிலும் ஒலிக்குமா? எங்களுக்கு அவ்வளவு ஆதிக்க எண்ணமெல்லாம் இல்லை. எங்கள் மண்ணில் ஒலிக்க விடுங்கள் என்று தான் போராடுகிறோம்.

ஆக, தற்போது உருவாக்கப்பட்டிருக்கும் இந்து மதம் இந்தத் துணைக்கண்ட மக்கள் ஏற்கனவே கொண்டிருந்த வழிபாட்டு முறைகளை எல்லாம் விழுங்கிக் கொண்ட பிறகு பார்ப்பனிய மேலண்மையை, ஆகமத்தை, சமஸ்கிருதத்தை பரப்ப முயலும் உத்தி. அதைத் தான் நான் மறுக்கிறேன். அந்த நோக்கத்திற்காக உருவாக்கப்பட்டு எம் மக்கள் மீது திணிக்கப்படும் மதத்தை, கடவுளைத் தான் எதிர்க்கிறேன்”

"இஸ்லாமிய அடிப்படைவாதம் பற்றிக் கேட்டதற்கு இன்னமும் நீங்கள் பதில் சொல்லவில்லையே?”

"ஒரு இந்து குற்றம் செய்தால் அவன் குற்றவாளி ஆகிறான். ஒரு இஸ்லாமியன் குற்றம் செய்தால் அவன் தீவிரவாதியாக அறியப்படுகிறான். இது ஒரு உடைக்கவியலாத, விடுபட முடியாத சுழல் பிரச்சினை. முஸ்லிம் மதத்தைக் கடைபிடிக்கும் சிலர் பயங்கரவாதத்தைத் தேர்ந்தெடுக்கிறார்கள். அதே சமயத்தில் இங்கே வசிக்கிற ஒட்டு மொத்த முஸ்லிம் மக்கள் மீது சந்தேகமும், வெறுப்பும் உமிழப்பட்டு வந்திருக்கிறது. ஒன்று இன்னொன்றின் காரணியாகவும், விளைவாகவும் மாறி மாறி இருந்து வருகின்றன.

அதற்கும் கூட பார்ப்பனியத் தந்திர உத்திகள் மூல காரணம் ஆகும். ஒட்டு மொத்த இந்தியாவில் உள்ள பெரும்பாலான மக்களுக்கு முஸ்லிம் சமூகத்தின் மீது காழ்ப்புணர்ச்சி முன்பை விட இன்று அதிகமாகப் பெருகியுள்ளது. தான் இந்து மதத்தின் வஞ்சகமான திட்டத்தில் சிக்கியிருப்பதையும், தன்னை அடக்கி ஆளுவதற்கு ஒரு வாகனமாக மதம் என்ற சக்தியை மேல் சாதியினர் பயன்படுத்திகிறார்கள் என்பதையும் ஒருவனை மறக்கச் செய்து 'இந்து' என்ற போலியான போதையை ஏற்ற ஒரு பொதுவான எதிரி தேவைப்படுகிறான். அவன் தான் முஸ்லிம். இப்படிச் சொல்வதால் நான் சிறுபான்மையினர் என்ற போர்வையில் சிலர் நடத்தும் வன்முறைகளுக்குப் பரிந்து பேசுவதாகப் பொருள் கொள்ளக் கூடாது. குற்றவாளி, தீவிரவாதி யாராக இருந்தாலும் சட்டத்தின் முன்பு அவனுக்கு என்ன தண்டனை வழங்கப்படுமோ அதை வழங்க வேண்டும். அவனோ அல்லது எதிரானவர்களோ மதத்தோடு அவனை அடையாளப் படுத்தக் கூடாது”

"நீங்கள் சொல்வதை கேட்டால் இந்து மதத்தில் மட்டும் தான் பேதம் நிலவுவது மாதிரியும், மற்ற மதங்கள் எல்லாம் புனிதமானவை போலவும் இருக்கிறது”

"மதம் என்பது நல்ல நோக்கத்திற்காக உருவாக்கப்பட்டிருக்க வேண்டும் என்றுதான் தோன்றுகிறது. கவலை, குழப்பம் நேரும் போது மன அமைதி பெறவும், தவறு செய்தால் தண்டிப்பதற்கு நமக்கு மேலே ஒரு சக்தி இருக்கிறது என நினைத்து ஒழுக்கமாக நடந்து கொள்வதற்கும் மதம் மனிதனுக்கு உதவியிருக்கிறது. காலப் போக்கில் அந்த உயரிய நோக்கம் தோற்கடிக்கப்பட்டு ஆண்டான் அடிமைத் தனம் குடியேறி விட்டது. நான் இந்து மதத்தைப் பற்றி மட்டும் தான் பேச முடியும். அதில் எண்ணற்ற முறைகேடுகள் நிறந்துள்ளன என்பது எனக்குத் தெரியும். 'இந்து' நான் பிறக்க நேர்ந்த மதமாக இருப்பதால் அது சாத்தியமானது. நீங்கள் குறிப்பிட்டது போல வேறு மதங்களில் இது போன்ற சில்லறைத் தனங்கள் இருக்கலாம். அது பற்றி எனக்கு அவ்வளவாகத் தெரியாது.”

"மனிதனுக்கு மதம் தேவையில்லை என்கிறீர்களா?”

"சுயமாகச் சிந்தித்து பிறருக்குத் தீங்கிழைக்காமல் ஒழுக்கமாக வாழக்கூடிய ஒருவனுக்கு மதம் தேவையில்லை என்பேன். தனது நல்லது, கெட்டது எல்லாவற்றுக்கும் தானே பொறுப்பாளி என்பதை உணர்ந்து குழப்பத்திலும், சோகத்திலும் இருந்து விடுபட்டு வெளியேற முடிகிறவனுக்கு மதம் தேவையில்லை. அப்படி முடியாத ஒருவன், மற்றவர் மீது ஆதிகம் செலுத்தாமல், அல்லது வேற்று மத வழிபாட்டை வெறுக்காமல் ஒரு முறையைக் கடைபிடிப்பது தவறல்ல. என்ன இருந்தாலும் கடவுளையும், மதத்தையும் மனிதன் தான் உருவாக்கினான். அதில் எந்த மதத்தை வேண்டுமானாலும் தழுவிக் கொள்ளலாம்”

"நன்றி திரு.சுந்தரலிங்கம். எங்களுக்காக நேரம் ஒதுக்கி உங்களின் கருத்துக்களையும் பகிர்ந்து கொண்டீர்கள். இறுதியாக, நேயர்களுக்கு ஏதாவது சொல்ல விரும்பிகிறீர்களா?”

"கண்டிப்பாக. மனிதனை மனிதனாக வாழ விடுங்கள் என்று கேட்டுக் கொள்கிறேன். காலங்காலமாக அவனை அடிமைப்படுத்தி வைத்திருந்த சாதியத்தை ஒழித்து விடுங்கள். அதில் இருந்து அவனை மீட்டுக் கொண்டுவரும் முயற்சிகளைக் கண்டு கூச்சலிடாதீர்கள். நன்றி.”

இந்த ஆங்கிலப் பேட்டி இரண்டாவது முறையாக ஒளிபரப்பான போது வீட்டு சோபாவில் சாவகாசமாக உட்கார்ந்து பார்த்துக் கொண்டிருந்தார் சுந்தரலிங்கம். அது போக இரண்டு தமிழ் சேனல்களில் சட்டமன்றத் தேர்தல் பற்றிய சூடான செய்திகளை வாசித்துக் கொண்டிருந்தார்கள். அவை இரண்டும் மாநிலத்தின் பிரதானமான இரு அரசியல் கட்சிகளின் கைப்பாவையாக இருந்தன.

எதிர்க்கட்சி சேனலில் வந்த செய்தி அவரை நிமிர்ந்து உட்கார வைத்தது. நடப்பு எம்.எல்.ஏ.வும், ஆளுங்கட்சி வேட்பாளருமான ஒரு நபரின் மகன் அவரது தந்தைக்காகப் பிரச்சாரத்தில் ஈடுபட்ட ஒரு காட்சியைக் காட்டினார்கள்.

அந்த இளைஞர், "சொன்ன மாதிரியே மறக்காம ஒட்டுப் போட்டுருங்க. உங்களுக்கு என்ன பிரச்சினைனாலும் நாங்க பாத்துக்கறோம்.” என்று தந்தைக்கு வாக்குச் சேகரித்தார்.

அங்கே கூட்டமாகத் திரன்டிருந்த கீழ்சாதி மக்களில் ஒரு வாலிபன் பேசினான். பார்ப்பதற்கு நிறைய சினிமா பார்ப்பவனைப் போல இருந்தான்.

"எலெக்சனெப்ப மாத்திரம் வருவீங்க. ஜெயிச்சுட்டா மறுக்கா எட்டிக் கூடப் பாக்க மாட்டீங்க. எங்களுக்குத் தெரியாதுங்களா?” என்று கேட்டான்.

கை கட்டி நின்று கூளக்கும்பிடு போடும் சக்கிலியன் இவ்வளவு திமிராகப் பேசியதைக் கண்டு எம்.எல்.ஏ.மகனுக்கு கடும் கோபம் வந்தது.

"என்னடா பேசறே? ஐஞ்சு வருசத்துக்கு ஒருக்கா வராம தெனமும் வெட்ட வெடியால மாதாரி வளவுல வந்து உக்காந்து உங்குண்டிய நக்கிக்கிட்டு இருக்கோணும்கிறியா?” என்று எகிறினார்.

"அப்படீன்னா உங்களுக்கு ஓட்டுப் போட முடியாது. ஒழுங்கு மரியாதையா திழும்பிப் போயிருங்க” அந்த வாலிபனும் சளைக்கவில்லை.

எம்.எல்.ஏ. மகனுக்கு கோபம் அதிகமானது. காலில் இருந்த செருப்பைக் கழட்டி அவனை அடிக்கப் போனார். கட்சிக்காரர்கள் சிலரும், கீழ்சாதி மக்கள் சிலரும் அதைத் தடுக்கப் போராடினார்கள்.

இந்தக் காட்சி எல்லாம் தெளிவாக திரையில் ஓடியது. அதற்குப் பிறகு, யாரோ "கேமரா..கேமரா” என்று கத்தும் குரல் கேட்டது. பிறகு காட்சி தாறுமாறாகத் தெரிய ஆரம்பித்தது. படம் பிடிப்பதை மறைக்க முயன்ற கைவிரல் டி.வி.யில் பெரிய சைசில் தோன்றி மறைந்தது. அந்தக் காட்சி அதோடு நின்று போனது.

எதிர்க்கட்சி வேட்பாளரின் பேட்டியைக் காட்டினார்கள். வேறு சில அரசியல்வாதிகள், பொது மக்கள் கருத்துச் சொன்னார்கள். அவர்கள் அத்தனை பேரும் எம்.எல்.ஏ. மகனின் அடாவடித்தனத்தையும், அவரது தந்தையையும் கடிமையாகச் சாடினார்கள். இரவு எட்டு மணிக்கு இது பற்றி விரிவான விவாதம் நடக்கும் என்று செய்தி அறிவிக்கும் அம்மணி தெரிவித்தார்.

டி.வி.யை அணைத்து விட்டு செல்போனை எடுத்து, "ஏன்டா கூறு கெட்டவனே.. இப்படியா போய் பேசுவே? இப்ப்பப் பார் எல்லாம் போச்சு” என்று தன் மகனிடம் புலம்பினார் காங்கேயம் சட்டமன்ற உறுப்பினர் சுந்தரலிங்க ****ர்.

----------------------
இதை குமுதம் ஏன் வெளியிடாது? அட..அவுங்களுக்கு அனுப்பாம எப்படிங்க வெளியிடுவாங்க??

25 comments:

Anonymous said...

//இதை குமுதம் ஏன் வெளியிடாது? அட..அவுங்களுக்கு அனுப்பாம எப்படிங்க வெளியிடுவாங்க??//

அனுப்பினா மட்டும் போட்டிருவாங்களா? இதெல்லாம் கதைன்னு வெளியே சொல்லிக்காதே..

Anonymous said...

கதை மிகவும் நன்றாக இருக்கிறது.

அருண்,சென்னை said...

மிக யதார்த்தாமான கதை. பார்ப்பனன் என்று சொன்னாலேயே, இரத்தக் கொதிப்பு வரும் நண்பர்கள் அதிகம், இங்கே.

இவர்களில் எத்தனைபேர், மத்த சாதிக்காரர்களை சரிசமமாக நடத்துகிறார்கள் என்பது அவர்கள் மனசாட்சிக்கே வெளிச்சம்.

அவர்கள் நோக்கம், பிராமண எதிர்ப்பு மட்டுமே. மற்ற சாதிக்காரர்களுக்கு சமமதிப்பு என்பதல்ல.

சுஜாதா கதை, 'பழி ஓரிடம் பாவம் ஓரிடம்' என்பதன் பின்னணி. இந்திரா காந்தி கொலை செய்யப்பட்ட போது, 'சிங்' இனத்தவர் மீது தாக்குதல், அமெரிக்கா இரட்டை கோபுரம் சிதறிய போது, முஸ்லீம்கள் மீது தாக்குதல், இது போன்ற சம்பவம்தான் இதுவும்.

உணர்வுப்பூர்வமான முடிவெடுக்கும் முட்டாள்களின் செயல் அது. விடுங்கள்.

அப்பாவித்தமிழன் said...

அய்யாவுக்கு எதிரான இந்த ஊடக வன்முறையை கடுமையாக எதிர்க்கிறேன். ,...........
என்னது, "சுந்தரலிங்கமா?" அய்யாவைப்பத்தி எங்கயும் குறிப்பிடலயா? ஐயையோ, படிக்கும்போது, அய்யா பத்தியே எழுதுன மாதிரி இருந்ததுனால,
வழக்கம்போல அடிச்சு உட்டுட்டேனே!:-(
(மனசுக்குள்) சமாளி,சமாளி...

ஏ பார்ப்பனீயமே,
5000
வருடம்
அடக்கி
வைத்தவர்களுக்கு
1000
வருடம்
இட
ஒதுக்கீடு
இல்
லை
யாஆஆஆஆ!

மேல்சாதி ஊடகம் இந்த கவிதையை பிரசுரிக்குமா?

- கோபத்துடன் 'சுந்தரலிங்கத்தின்' தொண்டர்களில் ஒருவன்.

பொன்ஸ்~~Poorna said...

தலைவா, என்னாச்சு? பொங்கல் offஆ? ;) திடீர்னு கரையோரம்! :)

நல்லா வந்திருக்கு.. ஏன் உள்ளூர்லயே முடிச்சிட்டீங்க?! ;)

Kuppusamy Chellamuthu said...

அய்யா அனானி ராசாக்களே, அப்பாவித் தமிழனே.. இந்தப் பதிவுக்கும், எனக்கும் ராமதாஸ் எதிர்ப்புச் சின்னம் அளித்துக் கெளரவிக்க நீங்கள் செய்யும் முயற்சிக்கு நன்றி.'குழலி மன்னிக்க' என்று சொன்னதால் நான் டாக்டர் அவர்களைக் குறிவைத்துச் சோன்னதாகப் பொருள் கொள்ளும் அளவுக்கு குழலியோ..பொதுவான விஷயங்களைப் பற்றித் தவறாகப் புரிந்து கொள்ளும் அளவுக்கு பாலபாரதியோ பக்குவமற்றவர்கள் அல்லர்.

என்னைச் சுற்றி நான் கண்ட, காணும் சில முரண்பாடுகளின் வெளிப்பாடு தான் இந்தப் பதிவு. மேலும்...சுந்தரலிங்கம் கடலூர் எம்.எல்.ஏ. அல்ல..காங்கேயம் எம்.எல்.ஏ. என்பதைப் பணிவோடு தெரிவித்துக் கொள்கிறேன். (உண்மையில் காங்கேயம் எம்.எல்.ஏ. பேர் கூட எனக்குத் தெரியாதுங்க)

Anonymous said...

good story.
this is the thing happening in our home place also.
poor tamilnadu politicians cheating the peoples in the name of parpans.

really parpans were not the present problem of tamilnadu.

stupid polticians and people like peela bharathi, luckless look and kuzhalai.

✪சிந்தாநதி said...

ஆணித்தரமான வாதங்கள கடைசியில் சேம்சைடு கோல்...

கதை நல்லாத்தான் இருக்கு!

Anonymous said...

இந்தக் கதையில் என்ன சொல்ல வருகிறீர்கள்?
முற்போக்குத்தனமான எண்ணங்களுடன் இருப்பவரின் இரட்டை நிலையையா?இல்லை,பிற்போக்குத் தனத்துடன் நடந்துகொண்ட தனது மகனை கடிந்து கொண்ட ஒரு முற்போக்குவாதியின் நிலையையா?

மங்கை said...

நல்லா இருக்கு..சேம் சைடு கோல் போட்டாலும், உங்களின் மதில் இருந்து வெளிப்பட்டிருக்கிற கருத்துக்கள் உண்மை
உ-த
//நான் பார்ப்பனர் என்ற சமூகத்தினை எதிர்க்கவில்லை. பார்ப்பனியம் எனற ஆதிக்க முறையத் தான் எதிர்க்கிறேன். இதில் வேடிக்கை என்னவென்றால், பார்ப்பனியத்தைக் கடைபிடிப்பவர்கள் பெரும்பாலும் பார்ப்பனர்களாகவே இருக்கிறார்கள்//

நாகரீகமா நச்சுன்னு சொல்லி இருக்கீங்க

வாழ்த்துக்கள்

Udhayakumar said...

காங்கேயம் எம்.எல்.ஏ. ராஜ்குமார் மன்றாடியார் ன்னு நினைக்கிறேன்.

நல்லா சொல்லிருக்கீங்க. அடிதடியை வேடிக்கை பார்க்க நான் ரெடி, நீங்க அனானிமஸ் கமெண்ட் எல்லாத்தையும் தனி போஸ்ட்டா போடுங்க.

Anonymous said...

இவ்வளவு பேசற நாதாரி நீ பாப்பான் பத்ரி கிட்டே புத்தகம் போடச் சொல்லித் தொங்கிக் கிட்டு இருக்கறது தெரியாதா?

Thamizhan said...

பெரும் ம்னிதர் அழகப்பா வள்ளல்் அவருடைய ஆதரவுடனும் அவர் படத்தை ஒவ்வொரு இத்ழ் அட்டையிலும் போட்டு வளர்ந்த தமிழரால் ஆரம்பிக்கப்பட்டக் குமுதம்,திராவிடத்தலைவர்கள் பற்றி ஆராய்ந்து எழுதிய முரசொலி மாறனால் ஆரம்பிக்கப்பட்ட ச்ன் தொலைக்காட்சி இப்படி பல்ர் பார்ப்பன ஆதிக்க மற்றும் சூழ்ச்சியிலே விழுந்து விட்டது பரிதாபம்.ஏதோ பார்ப்பன அறிவுதான் தங்களுக்குப் பயன் அவர்களை எதிர்த்தால் தங்களை அழித்து விடுவார்கள் என்ற பயம்.
ஏன் மதிபிற்குரிய கலைஞர் அவர்களே கடந்த தேர்தல் வரை பார்ப்பனத்தை எதிர்ப்பதால் தேர்தலில் தோல்வி வரலாம் என்று நினைத்தவர் தானே.கடந்த தேர்தலில் பார்ப்பனர் ஒன்றாக சங்கரர் கைதையே மன்னித்து ராம்,சோ,குருமூர்த்தி அவரிடம் தூது சென்று அறிக்கைகள் ஒன்றும் அம்மையாருக்கு எதிர்த்துத் தரவேண்டாம் என்று கேட்டுக் கொண்டு ஒட்டு மொத்தமாக அம்மையாரின் அராஜகத்துக்கு ஆதரவு த்ந்தன்ரே,அதுதான் கலைஞரின் மாற்றத்திற்க்கு பெருங்காரண்ம்.
படித்த பதவிகளில் உள்ள பல தமிழர்கள் இன்றும் பார்ப்பான் என்று சொல்லவோ,பார்ப்பனீயத்தை எதிர்த்துப் பேசவோ பயப்படுகிறார்கள் என்பதுதான் உண்மை.சூத்திரன் சட்டத்திலே இருக்கலாம் ஆனால் பார்ப்பான் என்று சொல்வது அவமான்மா?பார்ப்பன் பத்திக்கைகளுக்கு இன்னும் ஈ.வெ.ரா,அண்ணாதுரை தானே!ராஜகோபால ஆச்சாரி,சங்கரன் உண்டா?இன்னும் ஜெகத்குரு சங்கராசாரிய சுவாமிகள் தானே? தமிழர் நடத்தும் இத்ழ்களும் பெரியார் என்று இபொபோது தானே எழுத ஆர்ம்பித்துள்ளார்கள்.
பார்ப்பனர்கள் சிலர் நாங்கள் மாறிவிட்டோம் நாங்களும் தமிழர்கள் தான் என்கிறார்கள்.அதுவும் பிழைப்பிற்கா உண்மையா என்பதை அவ்வப்போது சுஜாதா,வாலி போன்ற{இருவருமே சீரங்கத்து ரெங்க ராஜ அய்யங்கார்கள்தான்}வர்கள் வெளிப்படுத்துகிறார்கள்.இதிலே இன்னும் சாதி வெறி பிடித்தத் தமிழர்கள் மேலே இருப்பவனைப்பார்த்து கோவம் கொள்ளாமல் கீழே உள்ளவர்களைப் பார்த்து தங்கள் வெறியைக் காட்டி மகிழ்கிறார்கள்.வேதனையும் வெட்கமும் படவேண்டிய்து.
அரசு மட்டுஞ் செய்யக்கூடிய வேலையில்லை,இணையத்தில், படித்து பதவிகளில் இருந்து
ஓரளவு தெரிந்திருக்கும் நாமே இந்த சண்டை போட்டுக்கொள்ளும் போது நாம் யாருக்கும் அறிவுறை சொல்ல முடியாது .அனைவரும் சேர்ந்து முயற்சி செய்ய வேண்டியது நம் கடமை அதுதான் நாம் படித்துள்ளோம் ஏதோ பண்பட முயல்கிறோம் என்பதற்கு அடயாளம் .

Kuppusamy Chellamuthu said...

//தலைவா, என்னாச்சு? பொங்கல் offஆ? ;) திடீர்னு கரையோரம்! :) //

பொன்ஸ் அம்மையார்.. குசும்பு தானே? பொங்கலுக்கு எந்த ஊர்ல லீவ் வுடுறாங்க?

சிந்தா நதி மற்றும் மங்கை: வணக்கம். இதில் சேம் சைட் கோல் போட எதுவுமில்லை. ஒரு முன்னாள் அமைச்சர் வாக்குச் சேகரிப்பின் போது உண்மையில் நடந்த சம்பவம் இது. உதயகுமார் சொன்னது போல மன்றாடியார் அவர்கள் அல்ல. மன்றாடியார் இப்போது காங்கேயம் தொகுதி உறுப்பினராக இல்லை. தேர்தல் கூட்டணியில் காங்கேயம் காங்கிரஸ் கட்சிக்கு ஒதுக்கப்பட்டது என நினைக்கிறேன்.

Kuppusamy Chellamuthu said...

தமிழன்: அழகப்பா வள்ளல் ஆரம்பித்து சோ, ராம் வரை என்னென்னவோ விவரம் சொல்லியிருக்கிறீர்கள். இதெல்லாம் எனக்குத் தெரியாத/தெரிந்து கொள்ள இதுவரை முயற்சிக்காத தகவல்கள் என்பதால் கருத்துச் சொல்வது முறையாக இருக்காது. உங்கள் வருகைக்கும், ஆவணமாக்கலுக்கும் மட்டும் நன்றி தெரிவித்துக் கொள்கிறேன்.

Kuppusamy Chellamuthu said...

//இவ்வளவு பேசற நாதாரி நீ பாப்பான் பத்ரி கிட்டே புத்தகம் போடச் சொல்லித் தொங்கிக் கிட்டு இருக்கறது தெரியாதா?//

வாங்க ராசா வாங்க. உங்களைத் தான் தேடிக்கிட்டிருந்தேன்!!!

கண் மூடித்தனமான பிராமண வன்மமும், முகம் காட்டத் துணிவில்லாமல் உமிழப்படும் எச்சிலும் பதிவு செய்யப்பட வேண்டும் என்ற ஒரே காரணத்திற்காக மட்டுமே இந்தப் பின்னூட்டம் அனுமதிக்கப்படுகிறது (வேறு திசையில் துப்பிய எச்சிலுக்கும் இதே மதிப்பீடு தான்). இதற்கு மேல் விளக்கம் கூற வேண்டிய அவசியம் இல்லை.

எனினும், நீங்கள் சொறிந்து விட்டதால் நான் கூடுதலாகக் கொஞ்சம் சொறிந்து கொள்கிறேன். புத்தக புராஜெக்ட் பற்றிக் பேசிய போது என் தோளில் கை வைத்து நான் பூணூல் தரித்திருக்கிறேனா என்றெல்லாம் பார்த்து விட்டு பத்ரி பேசவில்லை. அவர் மிகத் திறமையான பிசினஸ்மேன். பத்ரியை விட எனக்கு நெருக்கமான, தொழில் முறையில் அவருக்குப் போட்டியான நன்கறியப்பட்ட ஓரிரு பதிப்பாளர்கள் சொல்லவே இதைக் கேட்டிருக்கிறேன். இருவருக்கும் இடையில் இருப்பது வர்த்தக ரீதியான உறவு தான். இதில் கொள்கைகளுக்கோ, கோட்பாடுகளுக்கோ இடமில்லை.

மேலும், இறுக்கமாகப் பற்றிக் கொண்டு அழும் கொள்கைகள் பல தருணங்களில் முன்னேற்றத்திற்கு முட்டுக்கட்டை இடும் என்பதை நான் அறிவேன். நமது சித்தாந்தங்கள் சுய பரிசீலனைக்கு ஆளாகாத வரை பின்னோக்கிய வளர்ச்சி மட்டுமே மிஞ்சும். அப்படிப்பட்ட ஒரு சுய பரிசீலனை முயற்சிதான் இந்தப் பதிவு. திராவிடம் பேசும் சில அரசியல்வாதிகளாலும் கூட தமிழகத்தில் சாதியம் வளர்க்கப்பட்டு வந்திருக்கிறது. விமர்சனத்திற்கு அப்பாற்பட்டவர்களாகத் தம்மை நிறுவிக்கொள்ள முயலும் ஆட்சியாளர்கள் சிலரின் நடவடிக்கை ஆரோக்கியமானதுமல்ல.

தான் வாழ்ந்த காலத்தையும், தன்னைச் சுற்றி வாழப்பட்ட வாழ்க்கையையும் பதிவு செய்ய வேண்டிய சமுதாயக் கடமை ஒரு படைப்பாளிக்கு உண்டு. அது தவிர, தனது சமூக அடையாளங்களை அழிய விடாமல் பாதுகாக்கும் ஆவலும், அதை ஆவணப்படுத்திப் பின் வரும் சந்ததியினருக்குச் சான்றாக விட்டுச் செல்லும் நோக்கமும் இருக்கும். அதைத் தான் சுஜாதா செய்திருக்க வேண்டும். அதில் தவறேதுமில்லை. (அதைச் சொல்லுமளவு எனக்கு அனுபவமும், வயதுமில்லை). உண்மையச் சொன்னால், சாமர்த்தியமாக எண்ணங்களை உட்செலுத்தும் ஆற்றல் கண்டு நான் ரசித்துப் பிரமிக்கும் வெகு சில மனிதர்களில் சுஜாதா முதன்மையானவர். Just Admire him!!

சுஜாதாவும், மணிரத்தினமும் அடிக்கடி சந்தித்துக் கொண்டால் நமக்கென்ன? பாரதிராஜாவும், வைரமுத்துவும் சந்திக்கவில்லையா? சத்யராஜும், சிவக்குமாரும் சந்தித்துக் கொள்ளவில்லையா? அப்போது நம் கண்ணுத் தெரியாத சாதி பிராமணர்களிடம் மட்டும் கண்டறியப்படுவது சில நேரங்களில் சலிப்பு உண்டுபண்ணுகிறது.

பொதுவாக 'பார்ப்பனர்' என்ற சொல்லை நான் கையாள்வதில்லை. ஆங்கிலப் பேட்டியைத் தமிழாக்கம் செய்வது போலப் பதிவில் எழுதும் போது 'பிராமணர்' என்றே குறிப்பிட்டிருக்கலாம். ஆனால், தமிழ் சமூக அரசியல் நூல்களில் கையாளப்படும் அதே ரீதிரில், அந்த விசை குறையாமல் ஒரு தாக்கத்தை ஏற்படுத்த வேண்டும் என்ற ஒரே காரணத்திற்காக மட்டுமே அதைக் கையாண்டேன். அனானிகள் உட்பட யாரையேனும் புண்படுத்தியிருந்தால் மன்னிக்கவும்.

பிறப்பின் அடிப்படையில் ஒருவனை ஒடுக்குவது 'பார்ப்பனியம்' என்றால், ஒருவன் பிராமணக் குடியில் பிறந்ததனால் மட்டுமே எதற்கெடுத்தாலும் குறை கூறி முத்திரை குத்துவதும் 'பார்ப்பனியம்' என்பதில் ஐயமில்லை.

மேலும், சமூக ஏற்றத் தாழ்வுகள் இந்தியாவில் மட்டும் நிலவியிருக்கவில்லை. நாம் அடிக்கடி மெச்சிக் கொள்ளும் ஆங்கிலேயர்களும் கூட lord, baron எனப் பல வடிவங்களில் ஆண்டான் அடிமைத் தனத்தைப் பேணி வந்ததைப் பலவாறாக அறிகிறோம். இரு நூற்றாண்டுகளுக்கு முன்னர் அமெரிக்காவில் (ஐரோப்பியக் காலனிகள்) விளைந்த பொருட்களுக்குப் பதிலாக ஆப்பிரிக்கக் கடற்கரைகளில் இருந்து கறுப்பின அடிமைகளைப் பிடித்து வந்து மேற்கிந்தியக் கரும்புத் தோட்டங்களிலும், வட அமெரிக்கத் தோட்டங்களிலும் அமர்த்தியதை உலகம் ஒரு பாவமாகவே கருதியிருக்கவில்லை.

எனக்குத் தெரிந்த பல பிராமண நண்பர்கள் முற்போக்கான சிந்தனை கொண்டவர்களாக இருக்கிறார்கள். ஜாதக, ஜோசியங்களை மறுத்து மணம் புரிந்து கொள்வதைக் காண முடிகிறது. காலத்திற்க்குத் தகுந்தவாறு உலகம் என்ன எதிர்பார்க்கிறதோ அதைக் கற்றுக் கொண்டு பழமைகளை உதிர்ப்பதில் சிறந்து விளங்குகின்றனர்.

இதையெல்லாம் சொல்வதால் என்னை பார்ப்பனக் 'கால் கழுவி விடும்' ஆள் என்று தீர்மானித்தால் கவலையில்லை.

Anonymous said...

You seem to please both the parties. Not many people have succeded in that :-)

Anonymous said...

//வாங்க ராசா வாங்க. உங்களைத் தான் தேடிக்கிட்டிருந்தேன்!!!

கண் மூடித்தனமான பிராமண வன்மமும், முகம் காட்டத் துணிவில்லாமல் உமிழப்படும் எச்சிலும் பதிவு செய்யப்பட வேண்டும் என்ற ஒரே காரணத்திற்காக மட்டுமே இந்தப் பின்னூட்டம் அனுமதிக்கப்படுகிறது (வேறு திசையில் துப்பிய எச்சிலுக்கும் இதே மதிப்பீடு தான்). இதற்கு மேல் விளக்கம் கூற வேண்டிய அவசியம் இல்லை.

எனினும், நீங்கள் சொறிந்து விட்டதால் நான் கூடுதலாகக் கொஞ்சம் சொறிந்து கொள்கிறேன். புத்தக புராஜெக்ட் பற்றிக் பேசிய போது என் தோளில் கை வைத்து நான் பூணூல் தரித்திருக்கிறேனா என்றெல்லாம் பார்த்து விட்டு பத்ரி பேசவில்லை. அவர் மிகத் திறமையான பிசினஸ்மேன். பத்ரியை விட எனக்கு நெருக்கமான, தொழில் முறையில் அவருக்குப் போட்டியான நன்கறியப்பட்ட ஓரிரு பதிப்பாளர்கள் சொல்லவே இதைக் கேட்டிருக்கிறேன். இருவருக்கும் இடையில் இருப்பது வர்த்தக ரீதியான உறவு தான். இதில் கொள்கைகளுக்கோ, கோட்பாடுகளுக்கோ இடமில்லை.

மேலும், இறுக்கமாகப் பற்றிக் கொண்டு அழும் கொள்கைகள் பல தருணங்களில் முன்னேற்றத்திற்கு முட்டுக்கட்டை இடும் என்பதை நான் அறிவேன். நமது சித்தாந்தங்கள் சுய பரிசீலனைக்கு ஆளாகாத வரை பின்னோக்கிய வளர்ச்சி மட்டுமே மிஞ்சும். அப்படிப்பட்ட ஒரு சுய பரிசீலனை முயற்சிதான் இந்தப் பதிவு. திராவிடம் பேசும் சில அரசியல்வாதிகளாலும் கூட தமிழகத்தில் சாதியம் வளர்க்கப்பட்டு வந்திருக்கிறது. விமர்சனத்திற்கு அப்பாற்பட்டவர்களாகத் தம்மை நிறுவிக்கொள்ள முயலும் ஆட்சியாளர்கள் சிலரின் நடவடிக்கை ஆரோக்கியமானதுமல்ல.

தான் வாழ்ந்த காலத்தையும், தன்னைச் சுற்றி வாழப்பட்ட வாழ்க்கையையும் பதிவு செய்ய வேண்டிய சமுதாயக் கடமை ஒரு படைப்பாளிக்கு உண்டு. அது தவிர, தனது சமூக அடையாளங்களை அழிய விடாமல் பாதுகாக்கும் ஆவலும், அதை ஆவணப்படுத்திப் பின் வரும் சந்ததியினருக்குச் சான்றாக விட்டுச் செல்லும் நோக்கமும் இருக்கும். அதைத் தான் சுஜாதா செய்திருக்க வேண்டும். அதில் தவறேதுமில்லை. (அதைச் சொல்லுமளவு எனக்கு அனுபவமும், வயதுமில்லை). உண்மையச் சொன்னால், சாமர்த்தியமாக எண்ணங்களை உட்செலுத்தும் ஆற்றல் கண்டு நான் ரசித்துப் பிரமிக்கும் வெகு சில மனிதர்களில் சுஜாதா முதன்மையானவர். Just Admire him!!

சுஜாதாவும், மணிரத்தினமும் அடிக்கடி சந்தித்துக் கொண்டால் நமக்கென்ன? பாரதிராஜாவும், வைரமுத்துவும் சந்திக்கவில்லையா? சத்யராஜும், சிவக்குமாரும் சந்தித்துக் கொள்ளவில்லையா? அப்போது நம் கண்ணுத் தெரியாத சாதி பிராமணர்களிடம் மட்டும் கண்டறியப்படுவது சில நேரங்களில் சலிப்பு உண்டுபண்ணுகிறது.

பொதுவாக 'பார்ப்பனர்' என்ற சொல்லை நான் கையாள்வதில்லை. ஆங்கிலப் பேட்டியைத் தமிழாக்கம் செய்வது போலப் பதிவில் எழுதும் போது 'பிராமணர்' என்றே குறிப்பிட்டிருக்கலாம். ஆனால், தமிழ் சமூக அரசியல் நூல்களில் கையாளப்படும் அதே ரீதிரில், அந்த விசை குறையாமல் ஒரு தாக்கத்தை ஏற்படுத்த வேண்டும் என்ற ஒரே காரணத்திற்காக மட்டுமே அதைக் கையாண்டேன். அனானிகள் உட்பட யாரையேனும் புண்படுத்தியிருந்தால் மன்னிக்கவும்.

பிறப்பின் அடிப்படையில் ஒருவனை ஒடுக்குவது 'பார்ப்பனியம்' என்றால், ஒருவன் பிராமணக் குடியில் பிறந்ததனால் மட்டுமே எதற்கெடுத்தாலும் குறை கூறி முத்திரை குத்துவதும் 'பார்ப்பனியம்' என்பதில் ஐயமில்லை.

மேலும், சமூக ஏற்றத் தாழ்வுகள் இந்தியாவில் மட்டும் நிலவியிருக்கவில்லை. நாம் அடிக்கடி மெச்சிக் கொள்ளும் ஆங்கிலேயர்களும் கூட lord, baron எனப் பல வடிவங்களில் ஆண்டான் அடிமைத் தனத்தைப் பேணி வந்ததைப் பலவாறாக அறிகிறோம். இரு நூற்றாண்டுகளுக்கு முன்னர் அமெரிக்காவில் (ஐரோப்பியக் காலனிகள்) விளைந்த பொருட்களுக்குப் பதிலாக ஆப்பிரிக்கக் கடற்கரைகளில் இருந்து கறுப்பின அடிமைகளைப் பிடித்து வந்து மேற்கிந்தியக் கரும்புத் தோட்டங்களிலும், வட அமெரிக்கத் தோட்டங்களிலும் அமர்த்தியதை உலகம் ஒரு பாவமாகவே கருதியிருக்கவில்லை.

எனக்குத் தெரிந்த பல பிராமண நண்பர்கள் முற்போக்கான சிந்தனை கொண்டவர்களாக இருக்கிறார்கள். ஜாதக, ஜோசியங்களை மறுத்து மணம் புரிந்து கொள்வதைக் காண முடிகிறது. காலத்திற்க்குத் தகுந்தவாறு உலகம் என்ன எதிர்பார்க்கிறதோ அதைக் கற்றுக் கொண்டு பழமைகளை உதிர்ப்பதில் சிறந்து விளங்குகின்றனர்.

இதையெல்லாம் சொல்வதால் என்னை பார்ப்பனக் 'கால் கழுவி விடும்' ஆள் என்று தீர்மானித்தால் கவலையில்லை.

Well done a bold and True reply.
i admire your honesty

Sivabalan said...

குப்புசாமி,

நீங்கள் கூறி இருக்கும் கருத்துக்களுக்கு மாற்று கருத்து இருப்பினும் உங்களின் வெளிப்படையான எண்னங்களுக்கு வாழ்த்துக்கள்.

Anonymous said...

என்னய்யா சொல்ல வாரே? பாப்பானுகளை இருக்க விடலாமா இல்லாட்டி அடிச்சு விரட்டலாமா?

saathveegan said...

//பிறப்பின் அடிப்படையில் ஒருவனை ஒடுக்குவது 'பார்ப்பனியம்' என்றால், ஒருவன் பிராமணக் குடியில் பிறந்ததனால் மட்டுமே எதற்கெடுத்தாலும் குறை கூறி முத்திரை குத்துவதும் 'பார்ப்பனியம்' என்பதில் ஐயமில்லை.//

மிகவும் சரி.....

//எனக்குத் தெரிந்த பல பிராமண நண்பர்கள் முற்போக்கான சிந்தனை கொண்டவர்களாக இருக்கிறார்கள். ஜாதக, ஜோசியங்களை மறுத்து மணம் புரிந்து கொள்வதைக் காண முடிகிறது. காலத்திற்க்குத் தகுந்தவாறு உலகம் என்ன எதிர்பார்க்கிறதோ அதைக் கற்றுக் கொண்டு பழமைகளை உதிர்ப்பதில் சிறந்து விளங்குகின்றனர்.
//

இந்த வரிகளை வழிமொழிகிறேன்.

நன்றி.
சாத்வீகன்.

John Prabhakar said...

I liked it. It captures the long festering wounds in our society, the demagoguery and the lack of leadership as opposed to leaders in our competitive political environment. The protogonist's duplicity reflects our own in dealing with our differences. Two personalities, one- public and politically correct and another- private and differentiating deep within.

sembian said...

it's nice. But, not able to understand what did u want to say. Can u please clearly tell your point?

வேளராசி said...

க.சி.சிவக்குமார் கதைகளை படித்திருக்கிறீர்களா?.

Chellamuthu Kuppusamy said...

Velarasi: I have not had a chance to read his stories.