Monday, January 12, 2009

பிரபாகரனும், சென்னைப் புத்தகக் கண்காட்சியும்

இது பற்றிய பதிரியின் பதிவு.

- செல்லமுத்து குப்புசாமி
இப்போது சென்னையில் புத்தகக் கண்காட்சி நடைபெறுவது யாவரும் அறிந்ததே. அது குறித்து ஜனவரி 2-8 ஆனந்த விகடன் இதழில் ஒரு கட்டுரை வெளியாகியிருந்தது. அதில் 'இந்த வருடம் வெளியாகும் சில முக்கியப் புத்தகங்களின் பட்டியல்' ஒன்றைத் தொகுத்துக் கொடுத்திருந்தார்கள்.
பிரபாகரன் வாழ்க்கை வரலாறும் அதில் ஒன்று.

திருவிழா தொடங்கியதற்கு மறுநாள் தினத் தந்தியிலும், டெக்கான் குரோனிக்கிள் செய்தித்தாளிலும் வெளியான செய்திகள் வாயிலாக விடுதலைப் புலிகள் இயக்கத்தைப் பற்றிய புத்தகங்களை விற்கக் கூடாதென்று காவல் துறை வாய்மொழி உத்தரவு ஒன்றினைப் பிறப்பித்திருப்பதாக அறிந்தேன்.
பதிப்பாளர் பத்ரியைக் கேட்ட போது, “ஆமாம்” என்றார் சிரித்துக் கொண்டே.
சனிக் கிழமை கண்காட்சிக்கு நேரடியாகச் சென்று பார்த்த போது மறவன்புலவு சச்சிதானந்தம் உள்ளிட்ட பலரது புலி ஆதரவுப் புத்தகங்கள் எல்லாமே காணக் கிடைத்தன. “ராஜீவைக் கொன்றது அமெரிக்காவே” என்று பொருள்படுமாறு திருமாவளவன் கூட ஒரு நூலில் அட்டையில் தலைப்பிட்டு வைத்திருந்தார்.
ஆக, விடுதலைப் புலிகள் தொடர்பான எல்லாப் புத்தகங்களையும் விற்க வேண்டாம் என்று சொல்லவில்லை எனத் தெரிகிறது. நண்பர் மருதனின் ‘விடுதலைப் புலிகள்' நூலும், எனது ‘பிரபாகரன்' நூலும் மட்டுமே பலியாகியுள்ளன.
இந்தப் புத்தகங்களைத் தடை செய்ய எவ்வித முகாந்திரமும் இல்லை. அவை தடை செய்யப்படவும் இல்லை. ஆனால் புத்தகக் கண்காட்சியில் மட்டும் இப்போதைக்கு வைக்க வேண்டாம் என்று கேட்டுக் கொண்டுள்ளனர். மற்ற கடைகளிலும், கிழக்கு பதிப்பகத்தின் எல்டாம்ஸ் ரோடு காட்சியகத்திலும், ஆன்லைன் மூலமாகவும் எப்போதும் போல விற்கலாமாம்.
கருத்தியல் ரீதியாக ஒரு தடை செய்யப்பட்ட இயக்கத்தைப் பற்றிப் பேசுவதும், அதன் சித்தாந்தங்களைப் பற்றிப் பேசுவதும் ஜனநாயக உரிமை என்பது எனது அபிப்பராயம். நான் அதைக் கூடச் செய்யவில்லை. ‘பிரபாகரன் - ஒரு வாழ்க்கை' ஒரு நடுநிலையான புத்தகம்.
இருந்தாலும் போலீஸ்காரர்கள் அட்டைப் படத்தை மட்டுந்தான் பார்ப்பார்கள் போலும்.

3 comments:

Anonymous said...

வாழ்க கருத்து சுதந்திரம்.

சாமிக்கூட்டம் said...

தமிழரின் பூர்வீக நிலம் என்பதை மறுத்து, சுமார் 3000 வருடங்களுக்கு முன்பு இந்தியாவிலிருந்து தமிழர்கள் இலங்கைக்கு குடிபெயர்ந்தார்கள் என்றவாறு துவங்குகிறது மருதனின் ‘விடுதலைப் புலிகள்' நூல். இதற்காகவே நிச்சயம் தடை செய்யலாம்.

Ramesh said...

I cant believe this. This Karunanidhi is smart. He does not want anyone in Tamil Nadu know the history of Eelam struggle.