Sunday, March 10, 2019

வைகோ எனும் எமோஷனல் குவியம்

வைகோ அவர்களை இரண்டு முறை நேரில் சந்தித்திருகிகிறேன். ஒரு முறை தாயகம் அலுவலகத்தில். இன்னொரு முறை அவரது அண்ணா நகர் வீட்டில். சீமானெல்லாம் அரசியலுக்கு வந்திருக்கவில்லை. எதோ ஒரு கூட்டத்தில் பேசியதற்காக இயக்குனர்கள் சீமான் & அமீர் கைது செய்யப்பட்டிருந்தனர். அது 2008 ஆம் ஆண்டு. ஈழப் போர் தீவிரமாக நடந்து வந்த நேரம்.

தமிழில் 'பிரபாகரன் - ஒரு வாழ்க்கை' (கிழக்கு பதிப்பகம்) என்ற பெயரிலும் ஆங்கிலத்தில் Prabhakaran: The Story of his struggle for Eelam (Oxygen books) என்ற பெயரிலும் இந்த நூல்களை New Horizon Media அப்போதுதான் வெளியிட்டிருந்தது. அந்தப் புத்தகங்கள் பற்றி, (குறிப்பாக ஆங்கில நூல்) ஒரு நிகழ்ச்சி நடத்தி அதற்கு வைகோவை அழைப்பதற்காக பதிப்பாளரோடு கலந்து பேசிய பின்னர் சென்றிருந்தேன்.

முதல் முறை தாயகத்தில் சந்தித்ததற்கும் இரண்டாம் முறை வீட்டில் சந்தித்ததற்குமான இடைவெளியில் அதனை வாசித்திருந்தார். நிகழ்ழ்சி நடத்த ஒப்புதல் சொன்னார். பதிப்பாளரிடம் போனில் தொடர்பு கொண்டு பேசி விட்டுத் திரும்பினேன்.

அடுத்த நாள் அவரது உதவியாளர் அருணகிரியிடமிருந்து ஃபோன். தலைவர் பேசறார் இருங்க என்று தந்தார்.

"தம்பி கேட்டுக்கிடுங்க. ஈழம் சம்பந்தமா எதாவது நிகழ்ச்சியில நான் கலந்துக்குவேன். அதை வெச்சு என்ன கைது பண்ணலாம்னு திட்டம் வெச்சிருகிறதா எனக்கு தகவல் வந்திருக்கு. எனக்கு சிறை போறது ஒன்னும் புதிசில்ல. போய்ட்டு நாலு நாள்ல வந்திருவேன். சொல்லப் போனா அது எனக்கு பொலிட்டிகல் மைலேஜ்தான். ஆனால் நீங்க ஒரு வேலைல இருக்கீங்க. உங்கள நம்பி குடும்பம் இருக்கு. எங்கூட சேத்து உங்களையும் கைது செஞ்சா என்னாகும்னு யோசிச்சு பாத்துக்கிடுங்க. நிகழ்ச்சி வேணாம் தம்பி."

No comments: